أبيات من الدوبيت


الزول الصديق بي اسمه ماهو صديقك
لكن الصديق الشاركك في ضيقك
عن ساعة الصعاب تلقاه ديمه رفيقك
الناس تتوهم تقـول أخوك شقيقك


دنك دمعه سايل أظـنه مات مفـلوق
عب قـيبه ناح عسف ملانا خلوق
ملوك في دارنا نحن وبره مانا حلوق
نفوسنا نفوس ملايكة ما بتستجير مخلوق


شعراً ريش نعام والوجه شمع مصقول
وعنقها صب قزاز صانعنو في اسطنبول
أكتافا هدل والليد بقـول مجدول
قامت في القياس بين القصـر والطـول


زمنك كله تاكل باردة ما ضق حاره
أطـرى الليلة يا طه أم حمـد والساره
درق البازه جاك ذي سحابه الجاره
وحس أب جقره والقربين صواقعاً كاره


اكل حاره وما ضق بارده ماك داريني
وأســأل عني ربعاى البعرفو قريني
حس أبو قره والقـربين دوام باريني
أنا أخو الساره كان يبق الكلام عانيني


براق العشا الغرباني زادني علايل
وهفن لي بسسمات الظريف مو مايل ‏
البي ذوقه فاق أم جمــالاً هايل
النقــرابي والشف في أم فنايد خايل


العود مو طرب طرب الحديث في لسانها
والروح تستريح وكتين تواجه انسانها
طرب الحب غزل ومعاينات نعسانة
إيه معنى العصير والخمرة في كيسانها

فرع المحلب الشايل العمار فوق خوخه
اتدلك ضحي والفرخة شايلة لخوخـــه
كاوشته وبكى وسرب الدمع بي شلوخه
شفت الوز رطن وقع البحر بي فروخـه

الحوش المزيبق يا خلي كيف أوصافه
وللساكننه جوة .. وبره ما بنشافه
كان مو كلام الناس وربنا البنخافه
نعبد بالسبح للديسه هادل أكتافه

يا قمري الفروع بالله أنظر فني
وأنا كلما أدور أنوح ألقاك قاصر عني
نايرات الوجن بي حبهن لسعني
ضاقن بي فسايح الأرض ما وسعنـّـي

يالصديق أخوي مالك مدندن هام
والسمبر على بلد الدرادر حام
كان زولا بقيفولوا الملوك خــدام
يبقى يطرانا ويتخازز بعد ما نــام

الدرب انطرح واللوز جباله اتعلــــن
والبندر كتل فوانيسه البيوقـــدن ضلن
يافروج هضاليم الخلا الانجــلن
اسرع قودع أمسيت والمواعيـــد قلــــن

الدرب انطرح واللوز جباله اتناطن
والبندر كتل وفوانيسه البيوقـــــدن ماتن
يا فروج هضاليم الخلا الانجاطن
أسرع قودع امسيت والمواعيد فــــاتن

ود عرمـــــان الجـــلابي
عيد يا معيد من ابتلاك الصابك
وبابور الغرام المن بعادك جــابك
من بحر الغزال شطب جميع لحسابك
نايــرات الوجن طال حزنهم في غيابك

بشير الجبلابي
طرماجا سرخ دور ستة جابلو حواري
لا بسات قرمصيص ما اتقنعن بــدواري
كان عندك دراية أدريها بعد أعذاري
وشيل السيدات مجـــاني يــــا كمســــاري



www.sudanjabalab.com